Vedtekter for Valdres Historielag 

Stifta 24. mai 1915

Vedtekter vedtekne på årsmøtet 10. mai 2025 på Rabalen i Øystre Slidre.

§ 1 Namn

  • Namnet på laget er Valdres Historielag (VH).
  • Symbolet for VH er ei raud stavkyrkje på gul botn med to krossar i dei øvre hjørna. Symbolet kan og nyttast i svart-kvitt.

§ 2 Formål

  • Valdres Historielag er eit regionlag for dei frittståande lokale historielaga i Valdres.
  • VH har til oppgåve å spreie kunnskap om lokalhistoria i Valdres.
  • VH skal verne om fortidsminne og støtte opp om gransking av folkeliv og kultur i eldre tider.

§ 3 Lagsverksemd

• VH gjev ut Årbok for Valdres, og skal støtte aktivt opp om publisering av anna lokalhistorie.
• VH skal legge tilhøva til rette for lokallaga ved spreiing av informasjon og impulsar mellom anna ved å skaffe foredragshaldarar og ved tilskiping av kurs/seminar.
• VH kan vera medlem i Landslaget for Lokalhistorie og andre kulturvernorganisasjonar.
• VH skal arrangere eit felles arrangement kvart år, i samarbeid med eit av lokallaga. Arrangementet går på rundgang mellom lokallaga.

§ 4 Medlemskap

• Alle lokale historielag i Valdres og Valdresmusea er medlemmer.

§ 5 Styret

  • Styret kan bestå av seks til åtte personar. Styret består av ein representant frå kvar kommune representert ved dei lokale historielaga. Der det er fleire lokallag i ein kommune, vel dei kven som skal sitja i styret for Valdres Historielag. I tillegg skal det vera ein representant frå Valdresmusea. Leiaren er på val kvart år, og skal veljast blant dei som er valt frå lokallaga, eller på fritt grunnlag. Kvart styremedlem skal ha sin personlege varamedlem. Det er opp til lokallaga å velja sin styrerepresentant/ vararepresentant. Styret konstituerer seg sjølv, med sekretær, kasserar og andre funksjonar styret treng. Styret kan og velja å engasjere eksterne til oppgåver styret har.
  • Styret skal leie laget etter avgjersler frå årsmøte.
  • Ta løpande avgjersler gjennom året, også å forvalte lagets verdiar.
  • Styret forvaltar eventuelle fond/legat og verdiar og gjer vedtak i søknadar til slike.
  • Styret vel representantar der laget skal vera representert.
  • Styret oppnemner/engasjerer redaktør for arbeid med årbok/andre publikasjonar. Redaktøren har møte og talerett i styret for historielaget. Styret kan oppnemne ein materialforvaltar som har ansvaret for lageret av årbøker og andre publikasjonar som VH har på Valdres Folkemuseum.

§ 6 Årsmøtet

• Årsmøtet skal haldast kvart år innan utgangen av mars. Kunngjering skal skje med tre vekers varsel. Den som ynskjer å ta opp saker utanom vanlege årsmøtesaker, må sende framlegg innan to veker før møtet.
• Alle medlemmer har møte- og talerett på årsmøtet. To utsendingar frå kvart lokallag har røysterett.

Årsmøtet skal:

  • Godkjenne dei frammøtte representantane og deira stemmerett.
  • Godkjenne innkalling og saksliste.
  • Velja ordstyrar og skrivar, og to til å underskrive protokollen.
  • Behandle årsberetninga. Årsberetninga skal følgje kalenderåret.
  • Behandle revidert rekneskap. Rekneskapsåret skal følge kalenderåret.
  • Vedta arbeidsplan for komande år.
  • Fastsette eventuell kontingent.
  • Behandle andre saker som blir fremma av styret, og saker innkome innan fristen.
  • Velja styre og styreleiar.
  • Nedlegging av laget krev 2/3 fleirtal på årsmøtet. Skulle VH bli lagt ned, går verdiane og forpliktingane til laget og boklageret over til Valdresmusea. 

§ 7 Vedtektsendringar

• Vedtektsendringar må ha 2/3 fleirtal. Endringsframlegg skal sendast ut til lokallaga på høyring og må vera levert innan to veker før årsmøtet.

§ 8 Ekstraordinært årsmøte

• Ekstraordinært årsmøte skal haldast dersom minst tre styremedlemmer eller tre av lokallaga krev det. Reglar for innkalling skal følgje reglane for ordinært årsmøte.

 Lover for Valdres historielag

Vedteke på årsmøtet 1994 på Grønolen Fjellgard

§ 1 Formål

Valdres historielag (VH) skal ha til oppgåve å spreie kunnskap om lokalhistoria og folket i Valdres. VH skal verne om fortidsminne og støtte opp om gransking av folkeliv og kultur i gamle dagar. Valdres Historielag skal også vera eit samarbeidsråd for dei frittståande lokale historielaga i Valdres.

§ 2 Lagsverksemd

VH gjev ut Årbok for Valdres Historielag, og skal støtte aktivt opp om bygdebokarbeidet. VH skal legge tilhøva til rette for lokallaga ved spreiing av informasjon og impulsar mellom anna ved å skaffe foredragshaldarar og ved tilskiping av kurs/seminar.

VH er bindeleddet til Landslaget for Lokalhistorie og andre kulturvernorganisasjonar.

Ein gong i året skal styret kalle inn til samrådingsmøte for historielaga, der bygdeboknemnda, skriftstyret og representantar for lokallaga er deltakarar.

§ 3 Tilknyting

VH skal vera medlem av Landslaget for Lokalhistorie, og skal søke impulsar frå andre kulturvernorganisasjonar.

§ 4 Styret

Styret består av sju medlemmer. Formann, skriftstyrar og ein representant frå kvar kommune, der formannen representerer kommunen han er frå. Formannen er på val kvart år. Dei andre styremedlemmene, bortsett frå skriftstyraren, blir valde for to år. To varamedlemmer skal veljast for eitt år. Det skal vera ei valnemnd på tre medlemmer. Kvart medlem skal veljast for tre år, slik at eit medlem er på val kvart år. Kasserar og sekretær skal veljast mellom styremedlemmene av årsmøtet. Skriftstyrar blir vald av årsmøtet etter innstilling frå styret.

§ 5 Skriftstyret

Skriftstyret består av skriftstyrar, formann, sekretær og minst fire medlemmer slik at alle kommunane er representert. Desse blir valde for to år.

§ 6 Årsmøtet

Årsmøtet skal kunngjerast med tre vekers varsel. Den som ynskjer å ta opp saker utanom dei vanlege årsmøtesakene, må sende framlegg innan to veker før møtet.

Dersom det ikkje blir halde årsmøte to år etter kvarandre, kan ei gruppe interesserte – etter vanleg kunngjering – halde møte. Det nye styret overtek rettar og plikter etter det gamle.

§ 7 Lovendringar

Lovendringar må ha 2/3 fleirtal. Endringsframlegg må vera levert innan to veker før årsmøtet.