Ja, det er ei optimistisk overskrift, men målet er at det også neste år skal koma ut ei årbok frå historielaget. Når Ivar Aars no har avslutta gjerninga som skriftstyrar etter 49 årbøker, stod me ved eit vegskilje. Kven skulle ta over, og var det framleis liv laga å gje ut årbok?

Eit historielag har sans for tradisjonar, og etter litt tid i tenkeboksen, er no eit mindre skriftstyre/redaksjon etablert. Ole og Knut Aastad Bråten, Harald Hvattum og Nils Rogn har alt hatt sitt fyrste møte, og målet er at det også neste år blir ei årbok.

Skriv i boka!
Det vil seia, skal det bli årbok må me få inn stoff. Me skal redigere/utforme boka, skrivinga håpar me stort sett andre vil ta seg av. Rundt omkring sit det mange dyktige og kunnskapsrike lokalhistorikarar, både amatørar og meir profesjonelle. Desse håpar me vil hjelpe oss med å få ei årbok som er variert i tema, geografi og tid. Me oppmodar særleg til å få fram stoff frå vår nære fortid. Me har lett for å gløyme at det også er/blir historie.

Stor interesse for lokalhistorie
På Facebooksida vår har me no nær 1 500 medlemmer. Det tolkar me som at det er stor interesse for lokalhistorie og arbeidet vårt. Utan tvil er det mange av medlemmene som kan bidra med stoff til ei årbok, og me oppmodar alle som har idear til artiklar om å ta kontakt med oss. Det treng absolutt ikkje vera lange avhandlingar, me er opne for det meste av lokalhistorisk stoff frå Valdres. Det gjeld ikkje minst gamle foto, helst med gode tekstar til!

PS:
Me kan vel alt no røpe at om det ikkje blir eit spesielt tema i komande årbok, vil det bli rydda plass til litt omtale av Ivar Aars. Han kom inn i skriftstyret i 1968 då den fyrste Årboka kom. I 1975 vart han skriftstyrar, og han har hatt den jobben heilt fram til årets bok. 49 år som skriftstyrar må vel vera Norgesrekord og verdt litt omtale! Om du har ei historie om Ivar, tek me gjerne imot!